పోట్ల గిత్తను మరపిస్తున్న పొట్టేలు

కడప, జనవరి 20: కడప లోని చిన్నచౌకు బైపాస్‌లో వుంటున్న పోట్లగిత్తను మరిపింపచేసే ఓ పొట్టేలు సాహసాలు ఆశ్చర్యపరుస్తున్నాయి. అంతేకాదు సుమా ఆ యజమాని ఎక్కడికి వెళ్లినా అతని వెంటే వెళ్ళడంతో పాటు తెల్లారిందని గుర్తు చేస్తూ యజమానిని, కుటుంబ సభ్యులను నిద్దుర లేపుతూ తనవంతు సాయం చేస్తోంది. దీంతో ఆ కుటుంబం ఆ పొట్టేలుపై ఎంతో మక్కువ పెంచుకున్నారు. pottelu

చిన్నచౌకు బైపాస్‌లో నివాసముంటూ హోటల్‌ నిర్వహిస్తున్న గాజులపల్లె ఓబుల్‌రెడ్డి ఐదు నెలల క్రితం ఏడాది వయసున్న పొట్టేలు పిల్లను రామాపురం సంతలో రూ.3,500కు కొనుగోలు చేశారు. పొట్టేలు అనారోగ్యానికి గురి కావడంతో ఇక అది బతకదనుకున్న ఓబుల్‌రెడ్డి చింతకొమ్మదిన్నె సమీపంలో వున్న గంగమ్మ తల్లికి పొట్టేలు బతికితే బలిస్తానని మొక్కుకున్నాడు. అప్పటి నుంచి పొట్టేలు రోగం నయం కావడంతో పాటు బలంగా తయారైంది.

పదిమందిని టైర్‌ బండిపై కుర్చో బెట్టినా ఎద్దుకు దీటుగా బండిని లాక్కుంటూ వెళుతుంది. ఈ విన్యాసం ఆ ప్రాంతీయులను విశేషంగా ఆకట్టుకుంటోంది.
ఇంతవరకు పొట్టేళ్లు పొటేళ్లు పోట్లాడుకోవడం చూశాం. అయితే ఈ పొట్టేలు ఆ ప్రాంతంలో తిరుగుతుంటే ఎద్దులకైనా, ఎనుములకైనా, కుక్కలకైనా హడల్‌. యజమాని ముందు టీవీఎస్‌ (ద్విచక్రవాహనం)పై వెళుతుంటే ఎదురుగా ఎనుములైనా, ఎద్దులైనా వస్తే వెంటనే పొట్టేలు వాటిపై దూకి ఢీకొడుతుంది. ఈ పొట్టేలు దెబ్బకు ఎనుములు, ఎద్దులు తోకముడుస్తున్నాయి. ఓబుల్‌రెడ్డి దినుసుల కోసం నగరంలోకి వెళితే బండి వెనుక పరిగెత్తుకుంటూ వెళు తుంది. ఇంట్లో కుటుంబ సభ్యునిలా కలిసుంటూ ఆకలైనప్పుడు కావాల్సిన ఆహారాన్ని తీసుకుంటుంది. అంతేకాకుండా యజమాని హోటల్‌లో ప్రొద్దుపోయేదాక పనిచేసి అలిసిపోయినా పొట్టేలు తెల్లారి 5 గంటలు అయిందంటే చాలు కుటుంబ సభ్యులను నిద్ర లేపుతూ అందరినీ ఆశ్చర్య పరుస్తోంది.

Read : Tollywood Actor Tarun visit Devuni Kadapa